ՀՀ ԱԺ տնտեսական հարցերի հանձնաժողովը հավանություն տվեց նախագծին, որով առաջարկվում է մագիստրատուրայում, ասպիրանտուրայում և օրդինատուրայում մի շարք մասնագիտություններով սովորող ու միաժամանակ աշխատող անձանց եկամտային հարկը վերադարձնել՝ ուսման վարձի փոխհատուցման նպատակով:
Արմենպրես-ի հաղորդմամբ՝ «Հայաստանի Հանրապետության հարկային օրենսգրքում լրացումներ կատարելու մասին» օրենքի նախագիծը հանձնաժողովում ներկայացրեցին համահեղինակներ «Իմ քայլը» խմբակցության նախագահ Լիլիթ Մակունցն ու պատգամավոր Սիսակ Գաբրիելյանը:
«Այն քաղաքացիները, որոնք ուսմանը զուգահեռ կաշխատեն, նրանց եկամտային հարկը կվերադարձվի ուսման վարձի համար: Սկզբում նախագիծը վերաբերում էր նաև բակալավրիատի ուսանողներին, սակայն, քանի որ առայժմ չի ընդունվել Կրթության մասին օրենքը, այս փուլում նախատեսում ենք այս միտքը կիրառել մագիստրատուրայի, ասպիրանտուրայի, օրդինատուրայի համար»,-ասաց Սիսակ Գաբրիելյանը:
Նա շեշտեց՝ Կառավարության ծրագրով, ինչպես նաև «Իմ քայլը» դաշինքի ծրագրով խրախուսում են աղքատության հաղթահարումը հատկապես կրթության և աշխատանքի միջոցով: Եվ հենց այդ երկու գաղափարներն էլ ներառվում են նախագծում:
Բյուջեի վրա ռիսկերը կանխատեսելի լինելու համար նախագծով նախատեսվում է, որ առաջարկվող արտոնությունը կգործի կառավարության կողմից սահմանված մասնագիտություններում: «Այսօր Հայաստանում կան մի շարք ոլորտներ, որտեղ մասնագետների պահանջարկը շատ մեծ է, սակայն չկան։ Այդպիսի ոլորտներն են ՏՏ-ն, գյուղատնտեսությունը, ճարտարապետությունը և այլն»,-ասաց Գաբրիելյանն եւ ավելացրեց՝ փաստորեն սկզբնական փուլում նախագծով առաջարկվողը կտարածվի միայն որոշակի մասնագիտությունների գծով:
Համահեղինակ Լիլիթ Մակունցն անդրադարձավ նախագծի փիլիսոփայությանը՝ ասելով, թե չափազանց կարևոր է, որ խրախուսում են աշխատանքը: «Երբեմն նաև մագիստրատուրայում ուսանողների վարձավճարը հոգում են ծնողները, ընտանիքները, ու մենք գտնում ենք, որ այդ տարիքում ուսանողներն այն կարգավիճակում են, որ կարող են և՛ աշխատել,և՛ հոգալ իրենց ուսման վարձը: Նաև հոգեբանություն, մոտեցում է ձևավորվում, որը կարող է վարակիչ լինել այլ ոլորտների համար»,-ասաց նա ու նկատեց՝ սա հնարավորություն կտա նաև բակալավրիատում իներցիոն ձևով մասնագիտություն ընտրած անձանց աշխատելուն զուգահեռ փոխել մասնագիտությունն արդեն մագիստրատուրայում: