Երեկ կյանքից հեռացել է Հայաստանի Ալ. Սպենդիարյանի անվան օպերայի եւ բալետի ազգային ակադեմիական թատրոնի երգչախմբի երգչուհի Աննա Սարդարյանը: Այս մասին տեղեկացնում է օպերային թատրոնի ֆեյսբուքյան էջը։
«Հայկական ժամանակին» թատրոնից հայտնեցին, որ երգչուհու կյանքի ավարտի պատճառը եղել է երկկողմանի թոքաբորբը:
Դիահերձումից հետո է պարզ դարձել թոքաբորբի առկայությունը, բայց բժիշկները չեն կարողացել ասել, թե արդյոք նա կորոնավիրուսով վարակված եղել է, թե չէ։ Երիտասարդ կինը կյանքից հեռացել է տանը: Նա միայնակ է ապրել։
Աննա Սարդարյանը կյանքից զրկվել է հիսուն տարեկան հասակում։ «Արմենպրես»-ի հետ զրույցում թատրոնի փոխտնօրեն Կարինե Կիրակոսյանն ասաց, որ Սարդարյանի հետ կատարված դեպքը տեղի է ունեցել մարտի 31-ին: Կիրակոսյանն ու ավելացրեց, որ հավելյալ ինֆորմացիա երգչուհու մասին չունեն։
Երգչախմբի անդամները վերջին անգամ օպերային թատրոնում են եղել մարտի 13-ին: Թատրոնի ամբողջ անձնակազմն իր ցավակցությունն է հայտնում Աննա Սարդարյանի ընտանիքի անդամներին և մտերիմներին: